सुनसरी जिल्लाका चारवटै प्रतिनिधिसभा निर्वाचन क्षेत्रमा निर्वाचन अधिकृतको कार्यालय स्थापना गरिएको छ। आगामी फागुन २१ गते सम्पन्न हुने प्रतिनिधिसभा निर्वाचनको सञ्चालन तथा व्यवस्थापनलाई लक्षित गर्दै शुक्रबार यी कार्यालयहरू औपचारिक रूपमा उद्घाटन गरिएको हो।

प्रत्यक्ष निर्वाचन प्रणालीतर्फको उम्मेदवारी मनोनयन ६ माघमा हुने कार्यक्रम तय भएकाले निर्वाचन प्रक्रिया सहज बनाउन आवश्यक तयारीस्वरूप कार्यालय स्थापना गरिएको जिल्ला निर्वाचन कार्यालयले जनाएको छ।

इनरुवा नगरपालिका–२ स्थित शिक्षा तालिम केन्द्रमा मुख्य निर्वाचन अधिकृत तथा निर्वाचन क्षेत्र नम्बर २ र ४ को निर्वाचन अधिकृत कार्यालय स्थापना गरिएको छ। उक्त कार्यालयको उद्घाटन जिल्ला न्यायाधीश एवं मुख्य निर्वाचन अधिकृत तथा निर्वाचन क्षेत्र नम्बर ४ का निर्वाचन अधिकृत प्रकाश राउतको अध्यक्षतामा सम्पन्न भएको हो।

त्यसैगरी दुहबीमा निर्वाचन क्षेत्र नम्बर ३ को निर्वाचन अधिकृतको कार्यालय स्थापना गरिएको छ। उक्त क्षेत्रमा रोल्पाका जिल्ला न्यायाधिवक्ता पदमबहादुर कार्की निर्वाचन अधिकृत रहनुभएको छ।

यस्तै धरानमा निर्वाचन क्षेत्र नम्बर १ को निर्वाचन अधिकृतको कार्यालय स्थापना गरिएको छ। निर्वाचन क्षेत्र नम्बर १ का निर्वाचन अधिकृत दिव्यराज घिमिरेले कार्यालय उद्घाटन भएको जानकारी दिनुभएको छ।

जिल्ला निर्वाचन अधिकारी कृष्णप्रसाद पौडेलका अनुसार सुनसरीमा एक जना मुख्य निर्वाचन अधिकृत र चार जना निर्वाचन अधिकृत तोकिसकिएको छ। मुख्य निर्वाचन अधिकृतलाई निर्वाचन क्षेत्र नम्बर ४ को जिम्मेवारी समेत दिइएको छ।

निर्वाचन अधिकृतका कार्यालय स्थापना भएसँगै उम्मेदवारी दर्ता, निर्वाचनसम्बन्धी कार्य, समन्वय तथा व्यवस्थापन प्रक्रिया थप व्यवस्थित र प्रभावकारी हुने अपेक्षा गरिएको छ।