इनरुवा । जिल्ला सहकारी संघ लि. सुनसरी (इनरुवा–२) द्वारा आयोजित ३१औँ वार्षिक साधारण सभा भव्य रूपमा सम्पन्न भएको छ। कार्यक्रममा कोशी प्रदेश सरकारका उद्योग, कृषि तथा सहकारी मन्त्री माननीय इस्राईल मन्सुरी ज्यू प्रमुख अतिथिका रूपमा उपस्थित भई सभालाई सम्बोधन गर्नुभएको थियो।

कार्यक्रमलाई सम्बोधन गर्दै माननीय मन्त्री मन्सुरी ज्यूले सहकारी क्षेत्रलाई व्यवस्थित, पारदर्शी र आत्मनिर्भर बनाउने दिशामा प्रदेश सरकार प्रतिबद्ध रहेको स्पष्ट पार्नुभयो। उहाँले सहकारीहरूलाई किसानमुखी, उत्पादनमुखी र रोजगारी सिर्जनामुखी बनाउनु आजको आवश्यकता रहेको उल्लेख गर्नुभयो।

मन्त्रीज्यूले सहकारीमार्फत कृषि उत्पादन वृद्धि, किसानको जीवनस्तर उकास्न र ग्रामीण अर्थतन्त्र सुदृढ बनाउन सकिने धारणा व्यक्त गर्दै प्रदेश सरकारले सहकारी तथा कृषकलाई लक्षित नीतिगत सुधार, अनुदान, तालिम र प्रविधिमा पहुँच विस्तार गर्ने बताउनुभयो।

साधारण सभामा जिल्ला सहकारी संघका पदाधिकारी, विभिन्न सहकारी संस्थाका प्रतिनिधि, कृषक, स्थानीय जनप्रतिनिधि तथा सरोकारवालाहरूको उल्लेखनीय सहभागिता रहेको थियो। कार्यक्रममा संघको वार्षिक प्रगति प्रतिवेदन र आर्थिक विवरण प्रस्तुत गर्नुका साथै आगामी कार्ययोजनाबारे छलफल गरिएको थियो।

कार्यक्रमले सुनसरी जिल्लामा सहकारी आन्दोलनलाई थप सशक्त, प्रभावकारी र परिणाममुखी बनाउने अपेक्षा गरिएको आयोजकले जनाएको छ।