सुनसरी — दुहबी नगरपालिका भित्रका वडा नम्बर ३ र ४ मा औद्योगिक रासायनिक फोहोर प्रदूषणले भयावह रूप लिँदै गएको छ। बढ्दो प्रदूषणका कारण स्थानीय बासिन्दा आफ्नो पुर्ख्यौली थलो नै छोड्नुपर्ने स्थितिमा पुगेका छन्।

स्थानीय युवा शुभम दाहाल ले आक्रोश व्यक्त गर्दै भने, “हाम्रो स्वास्थ्यसँग खेलबाड तुरुन्त बन्द गरियोस्, नत्र हामी बाध्य भएर गाउँ छोड्नुपर्ने अवस्था आउँदैछ।” उनका अनुसार विषालु रासायनिक फोहोरका कारण वातावरण मात्र होइन, मानव स्वास्थ्यमा समेत गम्भीर असर देखिन थालेको छ।

स्थानीयवासीका अनुसार दुहबीका विभिन्न वडामा उद्योग विस्तारका क्रममा हतारमा गरिएको प्रारम्भिक वातावरणीय परीक्षण (EIA) कमजोर र अव्यवस्थित भएको छ। यही लापरवाहीका कारण उद्योगको क्षमता बढेसँगै प्रदूषण अनियन्त्रित रूपमा फैलिएको उनीहरूको आरोप छ।

स्वास्थ्यमा असर, वातावरणमा क्षति र बासस्थानमै संकट देखिएपछि स्थानीयहरू आन्दोलित बन्दै गएका छन्। जानकारहरू भने यसलाई गम्भीर मान्दै सम्बन्धित निकायले तत्काल अनुगमन, नियन्त्रण र दीर्घकालीन समाधानका कदम चाल्नुपर्नेमा जोड दिएका छन्।