सुनसरी जिल्लाको प्रतिनिधि सभा निर्वाचन क्षेत्र नम्बर–४ बाट आम जनता पार्टीका तर्फबाट तवरेज आलम अन्सारीले मोबाईल चुनाव चिन्हसहित उम्मेदवारी दर्ता गराएका छन्।

उम्मेदवारी दर्तापछि सञ्चारकर्मीहरूसँग कुरा गर्दै आलमले सडकमा उठेका जनचाहनालाई अब राज्यको नीति निर्माण गर्ने सर्वोच्च थलो संसदसम्म पुर्‍याउने प्रतिबद्धता व्यक्त गरे। उनले परिवर्तन, सुशासन र विकासलाई आफ्नो प्रमुख राजनीतिक एजेन्डा बनाएको बताए।

विगतदेखि पत्रकारिता, शैक्षिक क्षेत्र, सामाजिक सेवा तथा राजनीतिक गतिविधिमा सक्रिय रहँदै आएका आलम विभिन्न क्षेत्रबीच समन्वयकारी भूमिका निर्वाह गर्दै आएका व्यक्तित्वका रूपमा परिचित छन्। स्थानीय तहमा जनसमस्यालाई नजिकबाट बुझ्ने र समाधानका लागि पहल गर्दै आएका कारण उनी जनमुखी नेतृत्वका रूपमा स्थापित हुँदै आएका छन्।

उम्मेदवारी दर्ता कार्यक्रमका क्रममा आलमले जेन–जी आन्दोलनका ७६ जना शहिदहरूसहित देश र जनताको लागि बलिदान दिने सम्पूर्ण ज्ञात तथा अज्ञात शहिदहरूप्रति श्रद्धाञ्जली अर्पण गरे। शहिदहरूको त्याग र बलिदानलाई स्मरण गर्दै उनले अधुरा सपना पूरा गर्ने संकल्पसहित राजनीतिक यात्रामा अघि बढेको बताए।

उनले सुनसरी निर्वाचन क्षेत्र नम्बर–४ को पहिचान, गौरव, सम्मान र समृद्धिलाई संस्थागत रूपमा अघि बढाउने, साथै जनताका आधारभूत आवश्यकता र अधिकारलाई प्राथमिकतामा राखेर संसदमा प्रभावकारी भूमिका निर्वाह गर्ने प्रतिबद्धता जनाए।

यस निर्वाचनमा चेतनशील मतदाताहरूले मोबाईल चुनाव चिन्हमा मतदान गरी नयाँ राजनीतिक अभ्यासको थालनी गर्ने विश्वास व्यक्त गर्दै आलमले “जय जनता, जय मोबाईल” भन्ने नारा अघि सारे।

आफू भ्रष्टाचारविरोधी, जनमुखी र विकास केन्द्रित राजनीतिक धारको प्रतिनिधित्व गर्ने विकल्पका रूपमा उम्मेदवारी दिएको उल्लेख गर्दै आलमले जनताको सहभागिता र भरोसाबाटै परिवर्तन सम्भव हुने धारणा राखे।