सुनसरी । सुनसरी–मोरङ सिंचाई आयोजना अन्तर्गत जल उपभोक्ता समन्वय समिति, सुखसेना शाखा नहर, सुनसरीद्वारा आयोजित सम्मान कार्यक्रममा कोशी प्रदेश सरकारका नव नियुक्त उद्योग, कृषि तथा सहकारी मन्त्री माननीय इस्राईल मन्सुरी ज्यू तथा सामाजिक विकास मन्त्री माननीय रामप्रसाद मेहता ज्यूलाई सम्मान गरिएको छ।

भोक्राहा नरसिंह गाउँपालिका–२ स्थित सुखसेना शाखा नहर परिसरमा आयोजित कार्यक्रममा उद्योग, कृषि तथा सहकारी मन्त्री माननीय इस्राईल मन्सुरी ज्यू स्वयं उपस्थित भई सम्मान ग्रहण गर्नुभएको थियो। कार्यक्रममा जल उपभोक्ता समिति, स्थानीय जनप्रतिनिधि तथा समुदायका प्रतिनिधिहरूको उल्लेख्य सहभागिता रहेको थियो।

कार्यक्रममा वक्ताहरूले मन्त्रीद्वयले कृषि, सिंचाई तथा सामाजिक विकास क्षेत्रमा पुर्‍याउँदै आएको योगदान, समर्पण र नेतृत्वको खुलेर प्रशंसा गरेका थिए। विशेषगरी स्थानीय सिंचाई व्यवस्थापन, कृषकको जीवनस्तर सुधार तथा दिगो जल उपयोगमा सरकार र समुदायबीच सहकार्यलाई अझ सुदृढ बनाउनुपर्ने आवश्यकता औँल्याइएको थियो।

सम्मान कार्यक्रममार्फत स्थानीय जल व्यवस्थापनमा आपसी समन्वय, सहकार्य र साझेदारीलाई प्रोत्साहन गर्ने उद्देश्य व्यक्त गरिएको आयोजक समितिले जनाएको छ।

उक्त सम्मान कार्यक्रम मिति २०८२ साल पौष २७ गते (आइतबार) भोक्राहा नरसिंह गाउँपालिका–२, सुखसेना शाखा नहर, सुनसरीमा भव्य रूपमा सम्पन्न भएको हो।