हरिनगर गाउँपालिकाद्वारा आयोजित १६औँ राष्ट्रपति रनिङ्ग शिल्ड तथा अध्यक्ष कप खेलकुद प्रतियोगिता–२०८२ भव्य रूपमा सम्पन्न भएको छ। समापन समारोहमा कोशी प्रदेश सरकारका उद्योग, कृषि तथा सहकारी मन्त्री माननीय इस्राईल मन्सुरी ज्यू प्रमुख अतिथिको रूपमा उपस्थित भई कार्यक्रमको औपचारिक समापन गर्नुभएको हो।

समारोहलाई सम्बोधन गर्दै माननीय मन्त्रीज्यूले खेलकुद युवाको सर्वाङ्गीण विकास, अनुशासन, आत्मविश्वास तथा नेतृत्व क्षमताको निर्माणमा आधारशिला हुने उल्लेख गर्नुभयो। खेलकुदले स्वस्थ समाज निर्माणमा महत्वपूर्ण योगदान पुर्‍याउने बताउँदै उहाँले स्थानीय तहबाट यस्ता प्रतियोगिताहरू निरन्तर रूपमा आयोजना हुनु सराहनीय भएको धारणा व्यक्त गर्नुभयो।

माननीय मन्त्रीज्यूले खेलकुदमैत्री वातावरण सिर्जना गर्दै प्रतिभावान खेलाडी उत्पादनमा हरिनगर गाउँपालिकाले खेलेको भूमिका प्रशंसनीय रहेको बताउँदै, प्रतियोगिता सफलतापूर्वक सम्पन्न गर्न सहयोग पुर्‍याउने सम्पूर्ण आयोजक समिति, खेलाडी, प्रशिक्षक तथा सहयोगीहरूलाई हार्दिक धन्यवाद व्यक्त गर्नुभयो।

उक्त प्रतियोगिताले स्थानीय युवाहरूमा प्रतिस्पर्धात्मक भावना, भाइचारा र खेलभावना अभिवृद्धि गरेको सहभागीहरूको भनाइ छ।