काठमाडौं । नेपाली कांग्रेसको भोलि आइतबारदेखि सुरु हुने विशेष महाधिवेशनको पूर्वसन्ध्यामा राजधानीको भृकुटीमण्डप क्षेत्र राजनीतिक चहलपहलले गुलजार बनेको छ।

महाधिवेशनको तयारी अन्तिम चरणमा पुगेसँगै देशभरबाट आएका प्रतिनिधि, शीर्ष नेता तथा कार्यकर्ताहरू भृकुटीमण्डपमा भेला हुन थालेका छन्। कार्यक्रमस्थलमा मञ्च निर्माण, सजावट, ध्वनि तथा प्रकाश व्यवस्थापन लगायतका काम तीव्र गतिमा अघि बढाइएको छ।

साथै, महाधिवेशनलाई व्यवस्थित, सुरक्षित र भव्य रूपमा सम्पन्न गर्न सुरक्षा व्यवस्था कडा पारिएको छ। ट्राफिक व्यवस्थापनदेखि प्रतिनिधिहरूको आवतजावत सहज बनाउन विभिन्न संयन्त्र परिचालन गरिएको छ।

पार्टी नेतृत्व, कार्यकर्ता र शुभेच्छुकहरूबीच महाधिवेशनप्रति उत्साह देखिन थालेको छ। भोलिदेखि सुरु हुने विशेष महाधिवेशनले पार्टीको भावी दिशा, संगठनात्मक पुनर्संरचना र राजनीतिक रणनीतिमा महत्वपूर्ण निर्णय गर्ने अपेक्षा गरिएको छ।