इनरुवा । सुनसरीको इनरुवा नगरपालिका–४ स्थित युनिक एकेडेमीमा कक्षा १० का विद्यार्थीबीच सुरु भएको सामान्य विवादले उग्र रूप लिँदा विद्यालय परिसरमै आक्रमण, विद्यार्थी आन्दोलन र राजमार्ग अवरुद्धको अवस्था सिर्जना भएको छ।

मङ्गलबार बिहान सरस्वती पूजाका लागि उठाइएको चन्दाको विषयलाई लिएर कक्षा १० मा अध्ययनरत विद्यार्थीबीच विवाद भएको थियो। विवादकै क्रममा आफ्ना छोरालाई कुटपिट गरिएको दाबी गर्दै इनरुवा–४ का ४२ वर्षीय लालदेव ठाकुर विद्यालय पुगेका थिए। आफू सशस्त्र प्रहरी भएको परिचय दिँदै ठाकुरले कक्षा १० का सौरम मेहता, सन्दीप मेहता लगायतका विद्यार्थीमाथि कुटपिट गरेको आरोप लागेको छ।

आफ्ना छोरालाई सोही कक्षाका विद्यार्थीले चन्दाको विषयमा कुटपिट गरेको भन्दै ठाकुरले विद्यालयभित्रै विद्यार्थीमाथि हातपात गरेको दाबी गरिएको छ। घटनापछि आक्रोशित विद्यार्थीहरूले ठाकुरविरुद्ध नाराबाजी गर्दै जिल्ला प्रहरी कार्यालय सुनसरी अगाडि धर्ना दिएका थिए।

प्रदर्शनकै क्रममा ठाकुरको प्रदेश नम्बर १–०२–००४९ प ५९९४ नम्बरको मोटरसाइकलमा आगजनी गरिएको छ। विद्यार्थी आन्दोलनका कारण केही समय पूर्व–पश्चिम राजमार्ग अवरुद्ध भएको थियो भने प्रहरी कार्यालय परिसरमा समेत तनावपूर्ण अवस्था सिर्जना भएको थियो।

जिल्ला प्रहरी कार्यालय सुनसरीले घटनामा संलग्नमाथि छानबिन र कारबाही प्रक्रिया अघि बढाउने आश्वासन दिएपछि सडक सञ्चालनमा आएको हो। जिल्ला प्रहरी कार्यालय सुनसरीका प्रहरी नायब उपरीक्षक चन्द्रबहादुर खड्काका अनुसार आरोपित सशस्त्र प्रहरीको परिचर पदमा कार्यरत लालदेव ठाकुरसहित पाँच जनालाई नियन्त्रणमा लिएर घटनाबारे अनुसन्धान सुरु गरिएको छ।

घटनाले विद्यालयको शान्त वातावरणमा गम्भीर प्रश्न उठाएको भन्दै अभिभावक र सरोकारवालाहरूले दोषीमाथि कडा कारबाहीको माग गरेका छन्।