काठमाडाैँ । नेपाली कांग्रेसको विशेष महाधिवेशनमा हालसम्म २ हजार ६ सय ६२ जना महाधिवेशन प्रतिनिधिहरू सहभागी भएका छन्। आइतबार राति ९ बजेसम्म प्रतिनिधिहरूले आफ्नो नाम दर्ता गराएका हुन्।

महाधिवेशनको उद्घाटनसत्र सम्पन्न भइसकेको छ भने बन्दसत्र सोमबार बिहान १० बजेदेखि सुरु हुने छ। कांग्रेस नेता युवराज पाण्डेयका अनुसार हालसम्म कुल प्रतिनिधिमध्ये ५६.१२ प्रतिशतको सहभागिता रहेको छ।

प्रदेशगत सहभागिता विवरण अनुसार मधेश प्रदेशबाट सबैभन्दा बढी ४४६ जना प्रतिनिधि सहभागी भएका छन्। त्यसपछि कोशी प्रदेशबाट ४२५, बागमतीबाट ४३२, लुम्बिनीबाट ३९८, गण्डकीबाट २९६, सुदूरपश्चिमबाट १५८ र कर्णालीबाट १३४ जना प्रतिनिधि सहभागी भएका छन्।

त्यस्तै, काठमाडौं उपत्यकाबाट १७८ जना प्रतिनिधि उपस्थित भएका छन् भने भ्रातृ संगठन, शुभेच्छुक संस्था तथा जनसम्पर्क समितिबाट १ सय ९५ जना प्रतिनिधिको सहभागिता रहेको छ।

देशभर नेपाली कांग्रेसका कुल ४ हजार ७ सय ४३ जना महाधिवेशन प्रतिनिधि रहेका छन्। तीमध्ये हालसम्म २ हजार ६ सय ६२ जनाले सहभागिता जनाइसकेका हुन्। प्रतिनिधिहरूको नाम दर्ता तथा सहभागिता क्रम अझै जारी रहेको एक नेताले जानकारी दिएका छन्।