भोक्राहा–नरसिंह । नेपाल किसान महासंघ भोक्राहा–नरसिंह गाउँपालिका कार्य समितिद्वारा आयोजित स्वागत तथा सम्मान कार्यक्रममा सहभागी भई कोशी प्रदेश सरकारका नवनियुक्त उद्योग, कृषि तथा सहकारी मन्त्री माननीय इस्राइल मन्सुरी ज्यूले किसान समुदाय, स्थानीय जनप्रतिनिधि तथा सरोकारवालासँग आत्मीय भेटघाट तथा शुभकामना आदान–प्रदान गर्नुभएको छ।

कार्यक्रममा व्यक्त सम्मान, सद्भाव र विश्वासप्रति आभार व्यक्त गर्दै मन्त्री मन्सुरी ज्यूले किसानको हित संरक्षणलाई प्रदेश सरकारको प्राथमिकतामा राखिएको उल्लेख गर्नुभयो। उहाँले कृषि क्षेत्रको आधुनिकीकरण, उत्पादन वृद्धि, बजारिकरण तथा सहकारी अभियानको सुदृढीकरणमार्फत स्थानीयदेखि प्रदेशस्तरसम्म समावेशी, दिगो र आत्मनिर्भर विकास हासिल गर्न इमान्दारीपूर्वक कार्यसम्पादन गर्ने दृढ प्रतिबद्धता व्यक्त गर्नुभयो।