विराटनगर । विराटनगर–११ स्थित PARAS Multispeciality Hospital Pvt. Ltd. परिवारको आयोजनामा कोशी प्रदेश सरकारका नवनियुक्त उद्योग, कृषि तथा सहकारी मन्त्री माननीय इस्राइल मन्सुरी ज्यूको स्वागत तथा सम्मान कार्यक्रम सम्पन्न भएको छ।

उक्त अवसरमा माननीय मन्त्री मन्सुरी ज्यूले अस्पताल व्यवस्थापन, वरिष्ठ चिकित्सक, स्वास्थ्यकर्मी तथा विभिन्न क्षेत्रका शुभेच्छुकहरूसँग आत्मीय भेटघाट गर्नुका साथै शुभकामना आदान–प्रदान गर्नुभएको थियो। कार्यक्रममा सहभागीहरूले मन्त्री पदमा नियुक्त भएकोमा बधाई तथा सफल कार्यकालको शुभेच्छा व्यक्त गरेका थिए।

सम्मान कार्यक्रममा मन्तव्य राख्दै मन्त्री मन्सुरी ज्यूले आफूलाई प्रदान गरिएको सम्मान, सद्भाव र शुभेच्छाप्रति आभार व्यक्त गर्नुभयो। उहाँले स्वास्थ्य क्षेत्र समाजको मेरुदण्ड भएको उल्लेख गर्दै निजी तथा सार्वजनिक क्षेत्रबीचको सहकार्यलाई अझ सुदृढ बनाउँदै सेवा प्रवाहको गुणस्तर अभिवृद्धि, जनस्वास्थ्यको संरक्षण तथा सामाजिक विकासका पक्षमा प्रदेश सरकार निरन्तर रूपमा सकारात्मक पहल गर्न तयार रहेको स्पष्ट पार्नुभयो।

मन्त्री मन्सुरी ज्यूले अस्पतालजस्ता निजी स्वास्थ्य संस्थाले सरकारी संयन्त्रसँग हातेमालो गर्दै आम नागरिकलाई गुणस्तरीय, सुलभ र भरोसायोग्य स्वास्थ्य सेवा उपलब्ध गराउन महत्वपूर्ण भूमिका खेलेको उल्लेख गर्दै आगामी दिनमा आवश्यक सहकार्य, समन्वय र सहयोगलाई निरन्तरता दिने प्रतिबद्धता व्यक्त गर्नुभयो।

कार्यक्रम सौहार्दपूर्ण वातावरणमा सम्पन्न भएको अस्पताल व्यवस्थापनले जनाएको छ।