सुनसरी — जिल्लामा ग्यासको कालोबजारी बढेको गुनासो आएपछि जिल्ला प्रशासन कार्यालयले इनरुवास्थित ग्यास पसलहरूमा अनुगमन गरेको छ। अनुगमन समितिका संयोजक कृष्ण सुवेदीका अनुसार बजारमा कृत्रिम अभाव र कालोबजारीको सम्भावना जाँच्न विशेष अनुगमन गरिएको हो।

अनुगमनका क्रममा इनरुवाका पाँचवटा पसलमा बिक्रीका लागि राखिएको सुविधा, प्रिमा, कामख्या र कोशी ब्रान्डका ग्यास सिलिन्डरको अवस्था जाँच गरिएको थियो। उद्योग वाणिज्य सङ्घ इनरुवाका उपाध्यक्ष गिरीराज अटलका अनुसार हाल इनरुवामा आवश्यकताअनुसार ग्यास उपलब्ध रहेको र कालोबजारी भएको प्रमाण फेला नपरेको बताए। उपभोक्ताले आवश्यक पर्दा पालो प्रणालीमार्फत ग्यास पाइरहेको पनि अनुगमनमा देखिएको उनले जानकारी दिए।

अनुगमन टोलीमा जिल्ला प्रशासन कार्यालय, जिल्ला प्रहरी कार्यालय, उद्योग वाणिज्य सङ्घ तथा उपभोक्ता प्रतिनिधिहरूको सहभागिता रहेको थियो।

यसैबीच जिल्ला प्रशासन कार्यालय सुनसरीले ग्यासका उत्पादक, वितरक र डिलरलाई अनावश्यक मौज्दात नराख्न, पालो प्रणालीमार्फत पारदर्शी वितरण गर्न, कृत्रिम अभाव सिर्जना नगर्न र बजार मूल्यभन्दा बढी नलिन कडा निर्देशन दिएको छ। साथै खरिद–बिक्रीको विवरण व्यवस्थित रूपमा राख्न पनि भनिएको छ।

सुनसरीका सहायक प्रमुख जिल्ला अधिकारी घनश्याम न्यौपानेले प्रशासनको निर्देशन उल्लङ्घन गर्ने जो–कोहीमाथि कानुन अनुसार कडा कारबाही हुने चेतावनी दिएका छन्।