काठमाडौं । नेपाली कांग्रेसको दोस्रो विशेष महाधिवेशनबाट गगन थापा सभापतिमा निर्विरोध निर्वाचित हुने निश्चित भएको छ। विशेष महाधिवेशन पक्षका नेताहरूबीच भएको निरन्तर छलफलले पार्टी नेतृत्वलाई सर्वसम्मत ढंगले अघि बढाउने दिशामा ठोस सहमति जुटाएको छ।

स्रोतका अनुसार पार्टीका मुख्य पदाधिकारीहरूमा सहमति लगभग टुंगिएको छ। उपसभापतिमा विश्वप्रकाश शर्मा र पुष्पा भूसालको नाम फाइनल भइसकेको छ भने महामन्त्रीमा गुरूराज घिमिरे र प्रदीप पौडेल सर्वसम्मत चयन हुने भएका छन्।

समावेशी प्रतिनिधित्वलाई प्राथमिकता दिँदै सहमहामन्त्री पदमा विभिन्न क्लस्टरबाट नाम टुंग्याइएको छ।

फरमुल्लाह मन्सुर – मुस्लिम क्लस्टर

मुक्ता कुमारी यादव – मधेसी

प्रकाश रसाइली – दलित

डिला संग्रौला पन्त – महिला

बहादुर सिंह लामा – आदिवासी जनजाति

उदयशमशेर राणा – खस आर्य

यसैबीच थारू र पिछडिएको समुदाय क्लस्टरबाट थप दुई जना सहमहामन्त्रीको नाम टुंग्याउन छलफल अन्तिम चरणमा पुगेको स्रोतले जनाएको छ।

नयाँ नेतृत्व चयनसँगै नेपाली कांग्रेसमा एकता, समावेशिता र नयाँ सोचसहितको राजनीतिक यात्राको संकेत देखिएको छ। विशेष महाधिवेशनले पार्टीलाई आगामी दिनमा थप सशक्त र संगठित बनाउने विश्वास नेताहरूले व्यक्त गरेका छन्।