इनरुवा । सम्पूर्ण कृषि सहकारी संस्था लि., भोक्राहा नरसिंह गाउँपालिका–३, सिसोटोल, सुनसरीद्वारा आयोजित चौथो वार्षिक साधारण सभा–२०८२ तथा कोशी प्रदेश सरकारका नव नियुक्त उद्योग, कृषि तथा सहकारी मन्त्री माननीय इस्राईल मन्सुरी ज्यूको स्वागत तथा सम्मान कार्यक्रम माननीय मन्त्रीज्यूको गरिमामय उपस्थितिमा भव्य, सभ्य र उल्लासपूर्ण वातावरणमा सफलतापूर्वक सम्पन्न भएको छ।

कार्यक्रममा प्रमुख अतिथिका रूपमा उपस्थित माननीय मन्त्री मन्सुरीज्यूले सहकारी, कृषि र ग्रामीण अर्थतन्त्र सुदृढीकरणका विषयमा महत्वपूर्ण धारणा राख्नुहुँदै सहकारी अभियानले किसान र स्थानीय समुदायको आर्थिक सशक्तीकरणमा निर्णायक भूमिका खेल्ने उल्लेख गर्नुभयो। उहाँले उत्पादन, बजार व्यवस्थापन र सहकारीको पारदर्शितामार्फत आत्मनिर्भर ग्रामीण अर्थतन्त्र निर्माणमा सबै सरोकारवालाको सहकार्य आवश्यक रहेकोमा जोड दिनुभयो।

कार्यक्रमले सहकारी अभियानप्रति जनविश्वास अभिवृद्धि गर्नुका साथै स्थानीय कृषक र सदस्यहरूमा नयाँ ऊर्जा र उत्साह थपेको सहभागीहरूले बताएका छन्।