काठमाडौँ । पूर्वराजा ज्ञानेन्द्र शाहले मुलुकको भविष्यप्रति गम्भीर चिन्ता व्यक्त गर्दै देश लामो समयदेखि बहुआयामिक संकटमा फसिरहेको बताएका छन्। ३०४औँ पृथ्वी जयन्ती तथा राष्ट्रिय एकता दिवसका अवसरमा सन्देश जारी गर्दै उनले वर्तमान अवस्थाले निराशा बढाएको उल्लेख गरेका हुन्।

सन्देशमा पूर्वराजा शाहले राष्ट्रिय एकता कमजोर बन्दै गएको संकेत गर्दै सबै नेपालीलाई राष्ट्रिय कर्तव्यबोधका साथ एकतामा जुट्न आह्वान गरेका छन्। जनशक्ति, पुँजी र उद्यमीहरूको तीव्र पलायनले देशको भविष्यप्रति आशंका बढाएको भन्दै उनले यो प्रवृत्ति रोक्न सामूहिक जिम्मेवारी आवश्यक रहेको बताएका छन्।

उनले पृथ्वीनारायण शाहको एकीकरण अभियानलाई स्मरण गर्दै राष्ट्रहितलाई सर्वोपरि राख्ने परम्परामा फर्कनुपर्ने आवश्यकता औँल्याएका छन्। मुलुकको दीर्घकालीन हितका लागि राजनीतिक स्थिरता, सुशासन र आत्मनिर्भर अर्थतन्त्र अपरिहार्य रहेको उनको सन्देशमा उल्लेख छ।

पूर्वराजा शाहको सन्देशले राष्ट्रिय एकता, देशभक्ति र साझा उत्तरदायित्वबारे पुनः बहस सिर्जना गरेको छ।